Artiklar > Det skjer i Fjord i sommar!
Det skjer i Fjord i sommar!
I juni brakar det laust med sommar-arrangement i Fjord. Først ute er Eidsdalsrøre som går av stabelen 7.-9. juni.
Eidsdalsrøre og meir i juni
Det første er Eidsdalsrøre som går av stabelen 7.-9. juni. Fredag kveld er det konsert på Røde Kors-huset med legendariske Jonas Fjeld saman med multimusikar og eidsdaling Ole Jørn Myklebust og supergitarist Håvar Bendiksen. Jonas Fjeld på Røde Kors-huset. Laurdag er det klart for kultur- og familiedag, med marknad, konsertar, dyrehage og god stemning i pærehagen i sentrum. Laurdag kveld blir det ein spektakulæt countryfest med bandet Byting på utescene ved Eidsvatnet. Her er det mogleg med overnatting på eigen festivalcamp, og det blir sal av mat og drikke. Laurdag og søndag blir det også utstilling av Inga Elise Ytterdal sin tekstilarbeid i Torestova i Eidsdal sentrum.
Onsdag 5. juni vert det markering av Verdas miljødag med reperasjonskafe og andre tiltak i Glimt aktivitetssenter sine nye lokale i Valldal. Søndag 9. juni vert det blomservandring langs vegen i Fjørå. Begge desse arrangementa er det Fjord SV som står bak.
Fjord kulturskule si sommarforestilling kan du oppleve på Martin Linge-huset torsdag 13. juni.
Mefjellet opp og Olsok i juli
I slutten av juli er det klart for Valldal IL sine tradisjonelle arrangment. Søndag 21. juli kan du gå eller springe frå fjord til fjell i motbakkeløpet Mefjellet opp i Fjørå. Laurdag 28. juli er det olsokarrangement på hamna med underhaldning, sal av mat, Jordbærdilten og Minidilten. Fleire lokale lag er involvert. Søndag inviterer kyrkja til pilegrimsvandring og friluftsgudsteneste på Alstad i Valldal.
Kulturbeite og Skyrace i august
I august er Kyrkjehola kulturbeite tilbake med tre konsertar. Laurdag 3. august kan du finne sjelefred på konsert med Stig Ulv i Prestestova. Søndag 11. august vert det Blått svev i Rosekyrkja når Hildegunn Riise og musikarar inviterer til ein poesikonsert med dikt av Jon Fosse, til nykomponert, improvisert og tradisjonell musikk. Laurdag 24. august vert det kyrkjekonsert med Blue Horn Jazzband frå Sykkylven.
Laurdag 24. august er det også klart for Norddal Skyrace, motbakkeløpet i Norddal.
Kva skjer?
Du finn meir detaljert informasjon om dette i oversikta Kva skjer? på opplevfjord.no Kalenderen inneheld ei oversikt over arrangement rundt om i Fjord kommune i regi av både frivillige lag og organisasjonar, næringslivet og kommunen. Den same kalenderen finn du også på Fjord kommune si nettside.
Artikkelen er basert på arrangment som er meldt inn. Har du eit arrangement som ikkje står på lista? Meld inn arrangement enkelt via denne lenka
