Artiklar > Ung og reflektert dagleg leiar - Eg føler meg heime her

Ung og reflektert dagleg leiar - Eg føler meg heime her

Johan er ein av fleire lokale ungdommar som har flytta heimatt og fått jobb og stifta familie i Fjord.

Det er ikkje alle små bygder og kommunar som har hatt ein stigande trend i befolkningstala siste åra, men i Valldal er det fleire og fleire unge som vender snuten heim til oppvekstens stad. Og mange tek med seg både partnar og barn.

Johan Gregor Sandblåst er ein av disse, og tidlegare i år blei han dagleg leiar på Kulå Bowling og restaurant i Valldal, etter å ha pendla og jobba turnus som kokk i nokre år. - Det er her eg føler meg heime, seier han.

Tilhøyrigheit

Sandblåst fortel at han og kona, Evelina Sandblåst, kjøpte seg hus i Valldal i 2021, sidan han lengta heim. Ho jobbar som bakar og konditor på Sylteormen Bakeri, og begge er glade for å ha kort reiseveg til jobb. Det unge paret var berre 20 og 19 år gamle då dei kjøpte seg hus, og no har dei også ein liten baby saman og trivst godt. -Vi føler oss heime her, alle kjenner alle og vi får ei god kjensle, seier han. Sandblåst fortel at han har positive erfaringar med at folk i bygda er flinke til å ta imot folk med opne armar. -Viss ikkje hadde eg ikkje tatt med meg kone og barn hit, smilar han.

Ferdig med pendlarlivet

Sandblåst er utdanna kokk og har jobba i litt over to år på Stranda hotell. Han fortel at søkte på jobben på Kulå for å kome heim kvar dag, og følte seg ferdig med pendlarlivet. -Eg har også mykje tilhøyrigheit til Kulå, både som samlestad og jobb, seier han. Mora var nemleg dagleg leiar tidlegare, og han har derfor sjølv jobba der som både servitør og ryddegut i si ungdomstid.

Johan Gregor Sandblåst er ung dagleg leiar på Kulå Bowling og restaurant, og no er han glad for å ha flytta heim til Valldal. -Eg er oppvaksen her og her skal eg bli, seier han. Han tok med seg kona, Evelina Sandblåst og kjøpte hus her i 2021 og no har dei både barn og jobb i bygda.

Samfunnsansvar

Noko Sandblåst likar godt med jobben sin er ansvaret. -Då meiner eg ikkje berre jobbansvar, men eg følar også eit samfunnsansvar, seier han. Han synast at det er viktig å halde fram med eit tilbod som har vore her i mange år, og ønskja derfor å vere med på utviklinga og samarbeidet Kulå gjer til lokalsamfunnet. -Det er sjølvsagt også hyggeleg å møte folk kvar dag, og som faglært kokk har eg via livet til å gi god service til andre og lever for det, seier han. Det ønskjer han skal spegle seg i alt dei gjer på Kulå Bowling og restaurant.

Ein samlingsstad

Det er ikkje tvil om at dette er ein viktig samlingsstad for folk i området, og Sandblåst ønskjer å oppretthalde den gode trenden bedrifta har no. -Vi har hatt stødig drift til no, og framover ønskjer vi å utvikle og forsterke identiteten til Kulå, seier han. Han er oppteken av å få til gode samarbeid og eit godt samspel med andre aktørar i området, slik at dei kan fortsette å vere ein god samlingsstad for alle som ønskjer å ta turen. -Eg ønskjer at alt skal fortsette å vere som det er, berre enda betre, seier han.

Mykje som skjer

Framover mot jul er det mykje spennande som skjer på Kulå, og Sandblåst ramsar opp både quiz, dans, julebord, Halloweenfest og anna moro. Han oppfordrar alle til å ta turen, om det så berre er for å ete den lokalkjende, gode pizzaen dei serverar.